Usse Mera Abhi Ahsaas Hona Bhi

Bahut ummeed rakhna aur fir be'aas hona bhi,
Bashar ko maar deta hai bahut hasaas hona bhi,

Suno ik kaan se aur doosre se faink do bahar,
Bahut nuksan dey hai saheb-e-ahsaas hona bhi,

Agarchay tum dikhawe ke liye hi sath ho mere,
Chalo' itna hi kafi hai tumhara paas hona bhi,

Yun to abr-e-rehmat ki talab karta nahi hoon main,
Zaroori hai muqaddar main zara si pyas hona bhi,

Kai chehre latak jate hain khushiyo ki khabar sun kar,
Humein to roop deta hai ghamon ka raas hona bhi,

Jalegi khud-ba-khud saadi dilon mein pyar ki shama,
Ghanimat hai usse mera abhi ahsaas hona bhi...!!!

Mujhe Tum Yaad Aate Ho.

Mukaddar ke sitaron par,
Zamanay ke isharon par,

Udasi ke kinaron par,
Kabhi viraan minaaron par,

Kabhi sunsan rahon main,
Kabhi hairan ankhon main,
Kabhi bejaan lamhon main,

Tumhari yad chupke se,
Koi sargoshi karti hai,
Yeh palken bheeg jati hain,
Do ansu toot girte hain,

Main palkon ko jhukata hoon,
Bazahir muskurata hoon,
Faqat itna hi keh pata hoon,
Mujhey kitna satate ho,

Mujhe tum yaad aate ho.

Lakeeren mita deta

Kahan mumkin tha main dil se teri yaad mita deta,
Bhala kaise main jeeta! agar tujh ko bhula deta,

Teri Ruswai ke darr se labon ko si liya warna,
Tere Shaher-e-Munafiq ki main buniyadein hila deta,

Kiya tark-e-wafa uss ne, hogi uss ki majburi,
Jise barson dua di thi, usse kya bad-dua deta,

Khabar hoti agar mujh ko, nahi hai tu muqaddar mein,
Usi lamhe main, hathon ki lakeeren mita deta.